في ستين داهيه!!
كتب ابو نظاره - في موقع الاسماعيليه دوت كوم - طقطوقه علي الطاير جمع قيها مشاهد كثيره وقضايا وازمات ، وطلب ان نكنس عليهم مساجد الاسماعيليه. ورغم قصر الرساله الا انها كبسوله مركزه ويجب التروي في تناولها ، والا وقعنا تحت طائلة قانون الطوارئ ، واللي يعدي من قانون الطوارئ ، يغرق في عباره او يتحرق في قطار او مجلس شوري او يتهد عليه المقطم ، يا حرقه يا غرقه يا دفن بالحيا ، يبقي مش الاعتقال بقانون الطوارئ اقضل ، رغم ان البعض حيصرخ في وشي ويقول : بقي نقابل وجه كريم ولا نفضل مع وجوهكم العكره.
انا باشكر ابو نظاره لانه اداني طرف خيط الضم بيه مع اللي بيتنيل وبيحصل في البلد اللي فديناها بارواحنا وجت حكومه الحرق والغرق والردم ، علشان تنفض مصر من شعبها وتفضل هي لوحدها.
قبل رمضان الكريم ، كان فيه برنامج علي دريم قال فيه الدكتور العالم رشدي سعيد للمذيعه دينا عبد الرحمن ، ان فيه ناس في مصر لما اتقال لهم ان الدلتا مهدده بالغرق ردوا وقالوا: في ستين داهيه ؟!!! ويبدوا ان الفكره الحاكمه لحكومة الحزب الوطني هي شعار ( في ستين داهيه ؟!!! ) ، وهي حكومة وحزب ما بعد حرب اكتوبر 1973 ، اي اننا في زمن حصاد النصر ، ولا نسدد فواتير التدريب للحكومه الديجتال التي فشلت حتي فيما ينطق اللسان ، وزي ما بيقول المثل الملافظ سعد ، فالموضوع يحتاج اننا نقعد ونمدد ونجيب في السيره الغم بتاعتهم ...
اول الهم هو اللي قال في يوم ان الشعب المصري لم ينضج بعد لممارسة الديمقراطيه ، اللي هو رئيس الوزراء الكندي ، وآخر ما ربنا فتح عليه بيه في مصيبة الدويقه ، (أن الحكومة أقامت مساكن لسكان المنطقة وكانت ستسلم لهم خلال أربعة أسابيع لكن "القدر لم يمهلهم.(" ولينضم بذلك القدر الي الشمتانيين في مهام البحث عن مجرم في حريق الشوري ومصايب صخرة الخمسين طن. ونسي رئيس وزراء (اجر ... يوم) علي رأي فوازير بهاء جاهين في الاذاعه أن موضوع الانهيارات الصخريه فيه تقارير فنيه عنه منذ 1993 وايضا عندما سقطت الصخور علي مزارع الخنازير بالدويقه في اول الالفيه الجديده.
الحلال يٍٍِِِحْرَمْ والحرام اعظم
"من اوبريت علي بابا لفرقة رضا للفنون الشعبيه"
ولكن الهم اللي يخليك تجيب اللي في معدتك لو عندك دم ، وبني آدم بتحس ، هو موضوع عضو الشوري اللي ثروته 6.5 مليار دوررررر ( محوشهم من مصروفه ) ، واللي كري واحد باتنين مليون دورررر علشان يقتل واحده في دبي .... يا نهار ابوكم أسود من قرن الخروب ... هي دي مصر يا هابله ... وهو ده القطاع الخاص اللي بيقود التنميه ، وهو ده عضو السياسات بالحزب الوارث لثورة يوليو ولدم الضحايا ولقناة السويس وللسد العالي اللي فتحوه للاسرائيليين ... هو مين فيهم بس مصري علشان ننده عليه ونقول له مصر امك البهيه لا تستحق منك كده لو انت مصري ... ومن الورد البلدي ، لا وايه كمان واحد من المجلس المحروق ومن غير شماته طلع بيرشي القضاء ، ومش عايزينه يتحرق ... طب إزاي ؟؟؟ حد يفهمني .
ما هذا ؟!
كان عمر ابنتي ساره يقترب من الخمسة اعوام عندما اصطحبناها وشقيقها الي مسرحية "الملك هو الملك" ، ووسط حالة اداء حواري بين صلاح السعدني وحسين الشربيني باللغة العربيه التي صاغها سعد الله ونوس ، والقاعه تنصت ، إذ بساره تسرق الكاميرا وتصيح بلغة مسرحية عالية متساءله ... ماهذا ؟! ، وتصبح هي خلال اللحظة بطلة العرض ، ولم يكن بيدي من شئ افعله الا ان اربت علي كتفها الصغير ، وكأن شيئا لم يكن وبراءة الاطفال في عيني ، إن رآهما احد.
تذكرت الحدث و انا احاول متابعة ما يجري من حولنا ، واثناء محاولة البحث عن كلمات اغنيات المسرحيه التي صاغها احمد فؤاد نجم ، وتغني بها محمد منير ، وخاصة "طفي النور يا بهيه احنا عساكر دوريه" ، لاهديها الي محافظ الاسكندريه عادل لبيب اللي قال ان ( الشوارع المضيئه تقلل من الجريمه ) ، وتذكرت الحكايه الاسمعلاوي اللي بتقول ان واحد محافظ ماشي في الشارع لقي ان نص اعمدة النور مطفيه ، أصدر اوامره باطفاء النصف الآخر، وعايز ابو نظاره نكنس عليهم الجوامع ، حني النظافه مالهمش دعوه بيها ..آه يا بلديه يا .
طفي النور
طفي النور يا بهيه
طفي النور
كله عساكر دورية
جوزك راجع من سوقه
راكبه الهم وبيسوقه
نطو العسكر من فوقه
دورية ورا دورية
جوزك سارح على غيطه
بيلضم همه في خيطه
ازحوا العسكر على حيطه
يلعبوا عسكر حراميه
خالك راجع من مكة
طلعوا العفاريت في السكة
الف ولاد الجّنية
ولد رايح على عكا
يفتح سكه على سكه
طلعوا عليه سدوا السكة
واتحاصر رايحة وجاية
ايدي النور يا بهيه
كل العسكر حراميه
ابو عزه المغفل
وبما اننا ذكرنا سعد الله ونوس والملك هو الملك ، فنذكركم بالموضوع ، وهذا النص منقول ، وانشاء الله ربنا يقدرنا ونجيب ايضا تذكره بنص (محاكمة الرجل الذي لم يحارب) لممدوح عدوان ،
أما الملك الاصلي فيجن ليصبح في النهاية كأبي عزة المغفل .
جُوزْ أُمَكْ يا يوسف
جُوزْ أُمَكْ يا يوسف ، هكذا تنطقها مني زكي في فيلم "خالتي فرنسا" ، هي اقرب الي السب (الشتيمه) ، ومرادفها في السب هو مبتدأ وبلا خبر ، ودرج اللسان المصري علي استخدامه ، كما تعبير "ابن الكلب" ، وهو تعبير شاع الي حد ان يقول الناس ان الجد الاكبر للجميع كان كلب ، فهم إن سبوا احدا قالوا "ابن الكلب" وإن اعلنوا انبهارهم بآخر قالوا "يا بن الكااااالب" امعانا في المديح ، والنسب الي الكلب هو ايضا سب بالام ، فالمعني المباشر من النسب للكلب هو صفات حميده ، ولكن السب في الام يعني انه بلا أَبٍ محدد!
والله ما عايز ابطل ... لكن اختم ومن الملك هو الملك بيا مواويل الهوا يا مواويليا
يامصر
وإنتي الحبيبة
وإنتي اغترابي وشقايا
وإنتي الجراح الرهيبه
وإنتي إللي
عندك دوايا
علمني حبك عباره
سهله
وبسيطه
وعفيه
شرط المحبه الجسارة
شرع القلوب الوفية
يامه مويل الهوي
يامه مويليا
طعن الخناجر
ولا
حكم الخسيس فيا
والله يسامحك يا ابو نظاره ورمضان كريم
محمد الغزاوي
11 سبتمبر 2008
