بســه والخمس
ملوك الاورنس[1]
من صعاليك زماننا الاستاذ محمود السعدني وله مقولة في وصف البشر تسبق منتظر الزيدي بنصف قرن علي الاقل ، ويقول فيها : أن من البشر من تنحني له احتراما عندما تراه ومنهم من تنحني لتخلع حذاءك وتنهال به علي ام رأسه.
وكذلك كان لعم الصعاليك وتاج رأسهم كامل الشناوي وصفا للبشر من الورده وحتي الحذاء.
هذا كله كوم الا النوع بتاع بسه والخمس فهو صنف يتسم بالخسه وزي ما بيقولوا جلده تخين ما بيحوقش فيه ، وشخصية بسه والخمس شهدت منطقة القناه اشباها لها تحولوا فيما بعد بين متهم امام المحاكم بعد الثوره لتعاونه مع الانجليز او من نجح في التخفي ، وهم من اباطره ازمنة كثيرة ملاكا للاراضي والمباني ولكن اهم ما يتسمون به "الخسه والعماله" ، وسبحان الله اراه ووزير خارجيته وكل المحيطين به في امر معبر رفح مثل بسه والخمس ، يسرقوا من معسكرات الانجليز ويبيعوا للاهالي اللي مش لاقيين اكل ويعملوا فلوس واوضاع اجتماعيه ، وفي وقت الفراغ الخمس يلم سبارس بالعصايه اللي مركب فيها دبوس ، وتخيلوا ان الخمس ممكن يسيب اجتماع ويفضي طفاية السجاير في جيبه ، وممكن بسه لو شافه يديله علي قفاه ويقوله يا خمس بيه خلينا مركزين ، هؤلاء هم ملوك الاورنس ، لا يعلمون عن التاريخ المهدر علي ايديهم إلا احاديث "سكسكه" بتاعت الجيزه ام لسان زالف ، ونسيوا مع جريان الفلوس في ايديهم ان امثالهم اتحاكموا امام محكمة الشعب ، وأخدوا بالجزمه آسف بالحذاء.
وهناك دائما مع كل بسه وخمس حد من المحتلين ، تلاقيه عايش علي قفاهم ومشغلهم "وجوني" هذا الذي كان يناديه محمود المليجي في فيلم العصفور ، في ايامنا هو الخواجه نيكولا ساركوزي ، وهو كوزي بجد ، يفكرك بكوز السبارس بتاع الخمس ، وهذا الساركوزي تربية سي آي إيه وموساد ومأصل ، وابوه هربته السي آي إيه من المجر سنة 1956 ، وهو جندته الموساد زي ما قالت الفيجارو ضمن اربعه فرنسيين ، وبرضه ممكن تكون ليفني معاها اوراق الملف.
الكلام ده يرجع مرجوعنا للي كتبه الاستاذ هيكل في كتابه مدافع آية الله ، وسبحان الله ، الكلام كان عن الخميني والثوره الايرانيه ،والسفاري كلوب الذي كان يجمع مخابرات دول ايران الشاه وفرنسا والمغرب ومصر السادات ... وأخري، ومجموعة المهام التي قام بها في افريقيا ، وأخد علي قفاه في نجاح الثوره الايرانيه.
والسؤال دلوقتي بعد فشل مبادره الحاج عبد الله حامي الحرمين ، في المصالحه ، وفشل مبادرة قطر الدوحه في امر المقاومه ، مفيش حاجه تنجح الا مبادرة بسه والخمس ، بأمارة ايه يا سبعاويه.
آه مين سبعاويه ، دي الست هانم هيلاري كلينتون ، ماهمه بيغيروا علينا واحنا ضد قوانين الحركه لنيوتن.
والواحد يشوف البت مونيكا ويسلطها علي وزارة الخارجيه ، ونخلي قفا الهانم يقمر عيش يعني نلاعبهم بنسبية أينشتنين ومصطفي مشرفه.
شايفين يا ناس
الست ليفني بتقول انهم طحنوا وعجنوا وقتلوا وبلطجوا
والهاربين السارقين العرب يسألونهم الرضا
يا ملوك الاورنس احذروا محكمة الشعب
المهم اليومين دول فيه غزه كلوب ، ويضم مصر والاتحاد الاوربي الصهيوني وابومازن وفرقته وبندر بن سلطان وفرقته وسعود الفيصل وفرقته والحاج عبدالله ينزل مالوش في الليله ، وبتاع البحرين الملك الهام شاهين ، واي حد تاني من بتوع صرف المساعدات.
وكمان الراجل الغلبان المدهول اللي اسمه بانكي مون ، علي كل باتسته يا لون.
وشعبان عبد الرحيم اللي ماسك جامعة الدول العربيه من عند تقاطع محي الدين ابو العز لغاية البطل احمد عبد العزيز ، يعني من قائد طيران لشهيد في فلسطين ، شعبان عبد الرحيم لابس ساعتين بتاعته وبتاعت المدام وسكن في القطاميه ورضي عنه الكوايته وربك ستار وهو حيخلي باله من لغلوغه ولغلوغ ابو مازن ، اسوأ خمس في التاريخ .... يا ناس يا هووووه.
وانا قررت انشاء نادي ضد السفاري
وضد كل اجهزة المخابرات في العالم
وضد حرم اي حد وكمان خادم الحرمين
وعلي رأي واحد دخل علينا القلعه في فبراير 1972 واحنا جوه الزنازين ، البيه كان جاي متأخر ، وقال : اللي اعتدي علي حرم الجامعه ، حنعتدي علي حرمه ... وانفجر الكل ضاحكا ، وشر البلية ما يضحك.
مصطفي الغزاوي[1] ملحوظه : بسه والخمس هما شخصيتين عرضهما الكاتب اسامه انور عكاشه في مسلسل ليالي الحلميه ، وكانا تجسيدا لظاهرة المتعاملين مع المحتل والمستفيدين من وجوده ،وهم صوره من اثرياء الحرب ، وحديثا اثرياء الخصخصه ، والغريب ان كل جيل جديد منهم يكسب كل وضاعة الاجيال السابقه عليه وليس غريبا ان يكون اثرياء الخصخصه هم ذاتهم من قام بتوريد حديد التسليح والاسمنت الي العدو الصهيوني لبناء جدار الفصل العنصري في فلسطين ، وان تكون عناصر السلطه الفلسطينيه هي الوسيط بينهما.
